Nalulungkot ako para kay Ate PM

Nitong madaling araw, nagising ako sa isang hagulhol ng pangungulila ni Ate PM. Si Ate PM at si Ate Myrna ay iisa. 'Yon kasi ang bansag sa kanya ni Jimmy - Ate PM, meaning "Princess Myrna". By the way, si Jimmy ay isang mabuting kaibigan. Mahilig siyang magbigay ng bagong pangalan sa halos lahat ng kakilala niya. Tulad ko, pinangalanan niya akong "Dong" kasi daw bisdak ako. 'Yong isang kaibigan namin tinawag niyang "Bruha" kasi daw tulog nang tulog kahit araw. Kay Ate Raquel tawag niya "Sea Horse" kasi daw napakapayat at napakatangkad. Ang kapatid naman ni Ate Raquel tinawag niyang "Emperadora" kasi daw palaging kinakampihan nito si Ate Raquel. At kay Kuya Sam, tawag niya "Croc" as in Crocodile. Huwag niyo na lang alamin kung bakit ganun ang tawag niya. Ganun pa man, salamat kay Jimmy. Nang dahil sa kanya nagkaroon kami ng bagong pangalan. Mabait naman siya. Kaya bansag ko din sa kanya - "Dinosaur".

Well, balikan natin si Ate PM. Iyak ng iyak si Ate. Nakatanggap kasi siya ng tawag mula sa Pinas na yumao na daw ang nanay niya kaninang alas siete, Manila time. Nahihirapan siyang tanggapin ang katotohanan na wala na ang babaeng nagluwal sa kanya, ni hindi man lang niya ito masilayan bago pa man ito dalhin sa huling hantungan. Paano nga ba siya makakauwi sa Pinas? Kung inyong natatandaan si Ate ay isang hindi legal na OFW. Sinampahan siya ng kaso ng ER niya. Kung mag-voluntary surrender naman siya, tiyak na makukulong muna siya ng hindi lalagpas sa tatlong buwan bago siya ipapa-deport.

Kaya wala siyang magawa kundi ang umiyak at manalangin na sana maiintindihan ng kanyang yumaong ina ang kanyang sitwasyon. Bakas sa kanyang mukha ang pagsisisi. Nagsisisi siya kung bakit sa huling sandali di man lang niya mayakap ang kanyang ina.

Note: To know more about Ate Myrna, please follow this link.